Maisha Yenye Kusudi Ushauri wa Yesu

“Kuishi kama alivyoishi Yesu Kristo.”—1 Yohana 2:6, Biblia Habari Njema.

KAMA tulivyoona katika makala iliyotangulia, Yesu aliishi maisha yenye kusudi. Kwa hiyo, ikiwa tunataka kuishi maisha yenye kusudi tunahitaji kuiga mfano wake na kufuata ushauri wake.

Kama andiko lililo mwanzoni mwa makala hii linavyoonyesha, Yehova Mungu anataka tufanye hivyo. Kuishi kama Yesu alivyoishi kunamaanisha kuiga kikamili mfano na mafundisho yake. Kufanya hivyo kutatusaidia kupata kibali cha Mungu na kuwa na maisha yenye kusudi.

Mafundisho ya Yesu yalitia ndani kanuni nyingi ambazo zinaweza kutusaidia kuiga maisha yake. Tunapata kanuni kadhaa katika Mahubiri yake ya Mlimani yanayojulikana sana. Acheni tuchunguze kanuni chache na tuone namna tunavyoweza kuzitumia katika maisha yetu.

KANUNI: “Wenye furaha ni wale wanaotambua uhitaji wao wa kiroho.”—Mathayo 5:3.

KANUNI HIYO INATUSAIDIAJE KUWA NA MAISHA YENYE KUSUDI?

Yesu alionyesha kwamba kiasili wanadamu wana uhitaji wa kumjua Mungu. Tunatamani kujua majibu ya maswali kama vile: Kwa nini tuko hai? Kwa nini watu wanateseka sana duniani? Je, kweli Mungu anatujali? Je, kuna maisha baada ya kifo? Tunahitaji kujua majibu ya maswali hayo ili tuwe na maisha yenye kusudi. Yesu alijua kwamba kuna chanzo kimoja tu cha majibu ya maswali hayo—Neno la Mungu. Alipokuwa akisali kwa Baba yake, Yesu alisema: “Neno lako ni kweli.” (Yohana 17:17) Je, Biblia inaweza kutusaidia kumjua Mungu na kuwa na furaha?

MFANO HALISI:

Akiwa mwimbaji mkuu kwenye bendi maarufu, Esa alikaribia kuwa mwanamuziki mashuhuri. Hata hivyo, Esa hakuwa na furaha. “Ingawa nilifurahia kuwa kwenye bendi, nilitamani sana kuwa na maisha yenye kusudi,” anasema. Baada ya muda Esa alikutana na mmoja wa Mashahidi wa Yehova. “Nilimuuliza maswali mengi,” anasema Esa. “Nilichochewa sana na majibu yake yaliyopatana na akili na yaliyotegemea Maandiko, na nikakubali anifundishe Biblia.” Esa aliguswa moyo na mambo aliyojifunza na akaamua kuweka wakfu maisha yake kwa Yehova. “Zamani nilikuwa na matatizo chungu nzima,” anasema. “Lakini sasa ninaishi maisha yenye kusudi.”*

KANUNI: “Wenye furaha ni wale walio na rehema.”—Mathayo 5:7.

KANUNI HIYO INATUSAIDIAJE KUWA NA MAISHA YENYE KUSUDI?

Sifa ya rehema inamaanisha kuwatendea wengine kwa huruma, fadhili, na kwa ufikirio. Yesu aliwatendea kwa rehema watu wenye uhitaji. Kwa sababu aliwasikitikia watu, alichochewa kuwasaidia. (Mathayo 14:14; 20:30-34) Tunapomwiga Yesu kwa kuwaonyesha wengine rehema tunakuwa na maisha yenye kusudi zaidi, kwa sababu wale wanaoonyesha rehema hupata furaha. (Matendo 20:35) Tunaweza kuonyesha rehema kwa maneno na matendo yetu, na hivyo kutoa kitulizo kwa wale wanaohitaji msaada. Je, kuonyesha rehema kunaboresha maisha yetu?

Maria na Carlos

MFANO HALISI:

Maria na mume wake Carlos wanajitahidi kuonyesha rehema. Baba ya Maria alifiwa na mkewe, na kwa miaka kadhaa amelazwa kitandani. Maria na Carlos walimleta nyumbani kwao nao humwandalia mahitaji yote. Mara nyingi hawalali usiku, hata wanalazimika kumpeleka hospitalini anapolemewa na ugonjwa wa kisukari. Wanakiri kwamba nyakati nyingine wao huchoka sana. Hata hivyo, wana furaha, kwa sababu kama Yesu alivyosema wanaridhika kujua kwamba wanajitahidi kumtunza baba ya Maria.

KANUNI: “Wenye furaha ni wale wanaofanya amani.”—Mathayo 5:9.

KANUNI HIYO INATUSAIDIAJE KUWA NA MAISHA YENYE KUSUDI?

Maisha yanakuwaje yenye kusudi tunapofanya amani? Kwanza, tunafurahia uhusiano mzuri pamoja na wengine. Ni vizuri kutii ushauri huu wa Biblia: “Ikiwezekana, kwa kadiri inavyowategemea ninyi, iweni wenye kufanya amani na watu wote.” (Waroma 12:18) “Watu wote” wanatia ndani watu wa familia na wengine ambao wana imani tofauti na sisi. Je, kufanya amani na “watu wote” kunaweza kutusaidia kuwa na maisha yenye kusudi zaidi?

Nair

MFANO HALISI:

Fikiria mfano wa mwanamke anayeitwa Nair. Kwa miaka mingi amekabili matatizo ambayo yamejaribu uwezo wake wa kufanya amani, hasa katika familia yake. Tangu mume wake alipomwacha miaka 15 hivi iliyopita, amelazimika kuwalea watoto akiwa peke yake. Mmoja wa wanawe alikuwa na zoea la kutumia dawa za kulevya na mara nyingi alipandwa na hasira na kumtisha yeye pamoja na binti yake. Nair anaamini kwamba mambo ambayo amejifunza katika Biblia yamemsaidia kufanya amani, hata katika hali hiyo ngumu. Anajaribu kutobishana wala kugombana. Anajitahidi kuwatendea wengine kwa fadhili, huruma, na ufikirio. (Waefeso 4:31, 32) Anaamini kwamba kufanya amani kumemsaidia kuwa na uhusiano bora katika familia na pamoja na watu wengine.

FIKIRIA WAKATI UJAO

Tukifuata ushauri wenye hekima wa Yesu, tutakuwa na furaha na kuridhika. Hata hivyo, ili tuwe na maisha yenye kusudi, tunahitaji pia kujua mambo yatakayotukia wakati ujao. Kwa kweli, maisha hayawezi kuwa na kusudi ikiwa tunachotazamia tu ni kuzeeka, kuwa wagonjwa, na mwishowe kufa. Lakini hayo ndiyo mambo tunayokabili katika ulimwengu huu.

Hata hivyo, kuna habari njema! Yehova anaahidi kuwabariki wale wanaojitahidi “kuishi kama alivyoishi Yesu.” Yehova anaahidi kwamba ataleta ulimwengu wenye uadilifu, ambamo wanadamu waaminifu wataishi kama Yehova alivyokusudia—milele wakiwa na afya kamilifu. Neno lake linasema: “Tazama! Hema la Mungu liko pamoja na wanadamu, naye atakaa pamoja nao, nao watakuwa watu wake. Na Mungu mwenyewe atakuwa pamoja nao. Naye atafuta kila chozi kutoka katika macho yao, na kifo hakitakuwapo tena, wala maombolezo wala kilio wala maumivu hayatakuwapo tena. Mambo ya zamani yamepitilia mbali.”—Ufunuo 21:3, 4.